 |
Infrastrutura básika barak maka melhoradu ona. Estrada nasional hanesan Dili - Ainaro; Dili - Batugede; Dili - Lautem, Baucau - Viqueque; foin iha dia 26 Novembru rona notísia katak iha tan projetu foun Gleno - Hatubuilico. Estrada kaber tena hanesan ajuleiju uma laran nian. Sa tan freeway husi Suai - Zumalay, ne semo deit. Depois, ponte kais Dili foin remata - Oe-cusse nian halo keleur ona; Dili - Atauro (rona katak ema deskute hela atu halo). Atu sae aviaun moso Aeroportu Oe-cusse furak ona. Suai nian bot hanesan mos. Hela Dili nian maka agora iha diskusaun nia laran hela atu halo iha tempu badak tanba ne stratejiku tebes ba turismu . Eletrisidade? keta husu, tanba ne komesa kedan husi tinan barak ba kotuk. Ate kuaje Timor laran tomak atu kobre hotu ona. Bé mos? naturalmente Timor ne fonte bé barak. Ema iha Médiu Oriente deit bele moris. So ke ita nia problema maka seidauk dada ba kada ema ida-idak ninia uma. Agora infrastrutura básika kuaze barak maka iha ona no seluk barak tan sei OTEWE hela, será que ita sei uza nafatin rasaun problema infrastrutura?
Lae ona! ita presiza sériu no move on tanba ita halimar mak barak demais liu. Komesa husi alokasaun orsamentu. Ita presija hapara ona orsamentu ba aktividade sira nebe maka nia resultadu la klaru. Para ona aloka orsamentu ba aktividade em nome desenvolvimentu turismu ba halo konferensia iha rai liur, tuir expo, promosaun, lori investidores, asina nota de intendimentu ho ASEAN, WTO, UNDP, UNKNOWN, UNFORTUNATE, no ho UN...UN, ou Inter-Inter sira seluk. Sim, presiza duni, maibe tahan oituan, hein lai, depois, ita uza osan sira ne uluk hodi desenvolve didiak tia lai sasan sira ida ita atu fa'an ne lai. Kuandu forsa ona iha rai laran, ema maka mai deit. Alternativu seluk maka halo website ho video informativu no kapas hodi nune ita mos la presiza gasta osan barak, ema bele aprende husi internet deit antes atu mai visita. Tanba saida maka ita halo hanesan ne? tanba TIMOR OSAN OITUAN DEIT, LA BARAK IDA! Se kontinua nafatin, ema ida-rua maka aproveita liu husi ba pasiar no hetan perdiem makas; kona ba resultadu, ne longu prazu, e nu fim, ne segredu Aman laran luak Ninian.
Ita presiza sériu mos hare didiak ona ba ita nia planu stratejiku sira nivel implementasaun. Ita iha ona planu nivel nasional, mas ida ne sai hanesan matan dalan deit ba hodi hatene ita nia objetivu komun. Nia sei jeral liu, kalkula ba distansia karik, nia iha kalohan neba. Ita presija hare planu tematiku no spefisiku sira kada setor alen de ida-didak nia objetivu prinsipal, enkasha mos objetivu nasional desenvolvimentu turismu nian. Kada setor mos tengki konta ou konsidera ou integra komponente turismu nian. Planu sira ne'e presiza kait malu no implementa ho sériu para nia resultadu bele akumula hamutuk hodi fo impaktu bot kedan. Ema balun koalia nune, "oho manu rua ho fatuk ida deit" se lae, ita mak lao hansa ne'e nafatin, ida-idak mai ho nia projetu, nu fim resultadu nungka mosu no kontinuasaun laiha hela deit to fim do mundu.
Presiza komesa ona kuda kultura institutional foun. Hadia ita nia stratejia sira, tengki klaru no asaun sira tengki kona kedan mat laran. Ita atu desenvolve fatin turistiku ida, konseitu tengki klaru, objetivu tengki klaru. Hakat tok husi office laran sai ba koalia ho instituisaun relevante sira nebe iha papel. Se mak dada tutan ahi ba neba, se mak fui aspal ba iha neba, se mak dada bé ba neba, se maka atu fo siguransa no seluk-seluk tan. Presiza koalia hamutuk no kria objetivu comun no ikus keta haluha tau kedan ninia timeline ba servisu sira nebe iha.
Ita presiza tebes halo sasan ho sériu, se lae maka sei nafatin deit. 'Embot' iha nasional labele izola nia kakutak no konseitu ba deit iha espasu medida botir nian deit tanba interese no previleju . Tengki hanoin, imajina, no hateke luan hanesan husi Ramelau tutun tun ba karaik. 'Embot' labele koalia barak liu kona ba persentagem ejekusaun orsamentu. Tanba ida ne servisu prinsipal akuntan ninian. Mos la bele koalia barak liu maka progresu projetu no prosesu pagamentu tanba ne servisu prinsipal project manager no enjinheiru sira nia (se karik projetu fisiku ruma). Se nune nafatin maka ho lian bapa nian karik ema bolu Menteri rasa Akuntan ou Menteri rasa Project Manager. Iha Timor dala ruma ita susar atu distingisa pojisaun ema nian se ita rona deit husi vokabulariu nebe maka sira uza.
**Espera ida ne'e bele for inspirasaun.
