Formasaun Favela Foun Komesa Iha Estuáriu Mota Comoro

   Dili Junho 04 2023

Iha sidade Dili, wain hira meiudia tempu Rai-Manas-Rai-Rahun (RMRR), ita hateke vizinho sorin-sorin hetan deit maka tembok uma oan sira sena malu; fatin ida atu ba hodi dada is netik maka Tasi Ibun. Tasi Ibun sira ne'e hanesan espasu puúbliku gratuita ema hotu hakarak ba tanba núdar sidadaun iha sidade, ita iha direitu ba espasu públiku. Maibé Tasi Ibun sira ne'e komesa okupa hotu ona; okupasaun espasu públiku sira ne'e ninia karáter atu ba iha formasaun favela Tasi Ibun nian.

Hanesan hare iha linha kosteira parte Embasada Japaun - Embasada Korea nian oin. NGO/grupu ativista ambientál sira halo sira nia initiatívu monta roda at oan sira hodi kria fatin tu'ur. Intesaun hirak ne'e kapas tebes, maibé komesa atrai ona atividade komersial não formal sira. Kalan ida iha fulan rua liu ba, hau liu ba husu Alin ida lere hela du'ut. Nia dehan hamos hodi fa'an kafé iha neba. Kondisaun ikus nian hatudu katak roda oan sira ne'e komesa kulafur ona, nakales ona, keleuk ona, ema soe foer arabiru, ema faan nu, faan doce, kareta-motor para konforme tuir idak-idak nia fiar.   

Fatin foun ida atu sai tan nune mos. Area Estuária mota Comoro nian. Fatin ne'e uluk ita akompanha hakmatek tebes ba animal sira. Liu-liu manu sira tanba iha neba sei iha ai hún barak no lá dun iha movimentu populasaun barak. Fatin ne'e mos kapas tebes ba ema sira atu hare loron tun iha tempu lorokoraik. Kompara Tasi Ibun sira seluk, hela ida ne'e deit maka ita sei hare rai luan oituan tanba seidauk iha desenvolvimentu makas.

Iha tinan hira ikus ne'e asesibilidafe ba parte neba, Estuário Mota Comoro komesa loke diak ona ba públiku. Estrada halo konesaun diak entre husi Pantai Kelapa - Ponte Komoro 1 no 2. Iha tinan kotuk Diresaun Nasional Transporte Terestres (DNTT) deside fo tan lisensa rute foun transporte públiku (mikrolet) numero 13. Ida ne'e loke tan movimentu diak ba populasaun sira nebe hela iha area neba. Visitante barak mos komesa ba ona pasiar iha area refere. Initiativu projetu seluk nebe iha impaktu signifikante tebes maka projetu rehabilitasaun ba konstrusaun baragem Mota Comoro parte tasi ibun nian. Projetu ida ne'e hadiak baragem too iha tasi. Projetu ida ne’e mos ateru diak tebes tasi ibun parte leste husi moru protesaun. Iha Mota Ain nian ne’e komesa ateru diak tebes hodi nune kareta-motor-lao mos asesu barak diak tebes hanesan hatudu iha imagem.

Fatin kapas tebes ona. Maibe komesa iha sinál-sinál sira nebe maka hau espilika kona ba Tasi Ibun area sentru nian. Ema komesa hatuur uma oan ida. Uma oan kuaze ho karater semi permanente tanba konstrui ho sumenti, no no hari besi rin sira. Tanba tasi ibun iha neba ne’e luan kapas no estratégiku, ita espera katak fulan ida mai tan, komesa Ramayo ona.

Area Estuário Mota Comoro wain hira lá kontrole maka sei kria favela seluk ida tan fali iha Dili laran. Desenvolvimentu Aerportu nebe maka lao hela dadauk sei atrai tan kriasaun favela. Sei iha Projetu asesibilidade foun ida tan, maka hanaran Ponte Asesu Kampung Marinir. Projetu ida ne’e sei halo fatin ne asesével liu tan nune sei halo movimentu barak. Maibe antes atu halo konstrusaun ba ponte foun refere, favela sei okupa tan Estrada nining sira too iha tasi ibun.  Nia konsekwensia maka estadu tengki hasai tan osan hodi kompensa fali povu sira nebe maka tuir lolos agora dadauk ne’e it abele prevene.

Tanba ne’e sekarik autoridada ruma maka lê hela karik, halo hela buat ruma ba. Primeiru maka prevene atu favela mosu iha neba. Nune aban bain rua Tasi Ibun ne’e reserve ba Espasu Públiku. Segundu maka prevene ema halo favela foun para wain hira projetu Ponte Foun ba asesu ba Kampung Marinir mai, Estadu lá presiza hasai tan osan hodi kompensa ema sira nebe se karik Afetadu.

 

*Espera katak artigu ne’e bele fo Inspirasaun