Nudár nasaun kuaze maioria
absoluta ho populasaun religiaun kristaun katólika, Tasitolu hanesan sítiu
istoríku legendáriu. Iha 12 Outubro 1989 Amu Papa João Paulo II visita mai Timór
iha tempu neba. Gerasaun sira ne’ebé momentu partisipa iha funu hasoru Indonésiu
sira sai sasin no sira sente duni Tasitolu nain sira nebe invisível hamutuk ho
sira. Tanba ne’e sira baráni halo asaun demonstrasaun kona ba ukun rasik an hasóru
Amo Papa maske iha rísku tebes ba sira nia moris. Hau senti katak Vatikánu no mós
Roma sei iha rekordasaun istória rai didiak hela iha sira nia biblioteka. Wain ema
sira iha nebá lê lívru ou vídeo
ruma sira imagina fatin ne’e nudar fatin sagradu tan ne’e espera katak mantein
ho diak. No sira sei mai konfirma diretamente iha fulan Setembru 2024.
Iha okasiaun eventu festa independensia tinan 2002, ita ninia
lideransa sira designa Tasitolu sai hanesan jardim ba dame. Tasitolu hanesan símbolu
ba Amo Papa nebe lori dame no esperansa ba Timoroan iha moméntu neba. Tanba istória
no kultura Timor oan sira gosta oho malu, vinga malu, ódiu malu, no laran moras
ba malu (pior liu até a data), entaun designasaun Tasitolu nudar jardim dame ne’e
bele fo inspirasaun ba povu hodi fó liman ba malu hamutuk maun alin hodi halo
desenvolvimentu atu ensi ukun an nebe sosa ho ruin ho ran.
Iha tinan 2024 ida ne’e, Amo Papa
Francis atu visita mai iha Timor-Leste. Fatin ba Amo papa ninia atividade prinsipal
maka halo misa konsetra iha Tasitolu. Delegasaun husi Vatikánu, konvidadus, no povu
no sarani tomak sei konsetra hotu iha neba. Preparasaun agora namanas los. Komisaun
organizadora husi estadu prepara hela fatin refere, liu-liu konstrusaun palku atu
Amo Papa hamrik hodi halo misa bá. Foin dadauk iha loron hirak liu ba ita akompanha iha sosial media, kordenador komisaun
organizadora husi estadu no tékniku (teki-niki) sira hakilar malu no haksesuk
malu kona ba asuntu tékniku iha Amo Kardeal no Representate Vatikánu ninia oin.
Ida ne’e atu hatudu katak kordenador sira mesak kátolika puru no fanátiku ate
to’o haksesuk malu (ne’e o nia masin kaut maka ne’e).
Ho istória Tasitolu ninian, naran
Tasitolu agora sai nudar sentru atensaun ba ema hotu tanba valores ne’ebé partinente
ona. Maibé aparensia físika (tampak fisik) hanesan ema kbit laek ne’ebé temi
nia naran deit mas lá iha liu atensaun. Tasitolu hanesan lá haris komesa husi
tinan 1989. Iha tinan 2002, fo saráni tia maibé bé sani maran keleur tona. Ema
sira ne’ebé fo sarani mos agora lao dok ba fó sarani ema seluk iha fat-fatin.
Entaun Tasitolu Helena deit to’o agora. Wain hira Amo Papa atu mai visita, apa
sani sira lufu-lafu kuru be’e hodi fó haris, pinta kintu-kantu nune’e bele fó impresaun
katólikismu tebes. Krédiku imagem diak hetan ba lideransa no polítiku sira.
Maibé ha’u fiar katak Ema ou Lider klase hanesan Amo Papa Francis, iha ninia
matan rasik, tilun rasik, no sentimetu rasik atu bele haré Timor-Leste nudár
povu. Nia sei lá fiar absoluta deit impresaun sira haré husi atendementu
protokolu, no mos aparensia sítiu físiku iha ninia rute viagem liu ba-mai iha
sidade. Tanba sasan sira ne’e hetan konstrusaun ho objetivu atu simu los deit
Amo Papa.
Tasitolu nia naran inspirativu
maibé isin kulafur. Ita haré tok Tasitolu nudar ground zero ba Amo Papa João
Paulo II iha tinan 1989. Kapela oan sei manten ninia estrutura intaktu. Maibé area
kapela lá iha baliza protesaun ruma. Ema bele asesu ba-mai tun-sae ba laran konforme.
Lá iha jestaun ida kona ba asesu ba
Kapela designadu dehan sagradu. Lá iha siguransa iha areadores Kapela refere
tanba ne’e kualker atividade ema bele halo iha neba. Bele toba iha neba, hein transporte
públiku, namora, hemu tua, bele, bele mos hein malu atu sae ring iha neba. Estrutura
kapela ne’e mos tuan ona, sumentu reboka sira monu sai, ema pinta tun sae no
seluk tan nebe halo kapela refere lá serve duni ninia status nudar fatin
sagradu.
Tasitolu nia âmbitu klamar no
isin extende ba liur tan. Lagoa Tasitolu maka sai hanesan karakterístika
natural. Maibe Lagoa refere agora foer tanba ema soe foer iha neba. Ema soe foer
sintinia, fase ropa foer, no lixu sira. Lagoa hanesan habitat ba animal raru
sira, habitat mos ba biodiversidade ne’ebé presiza mantein hodi halo balansu
ekosistema moris nia iha sidade Dili. Maibé tanba foer, karakterístiku natural
sira ne’e komesa lakon ou lakon neneik; nu fim ekosistema bele at nune nia
afeta ba meiu ambiente eg geral iha Tasitolu no Dili laran tomak.
Aspetu seluk ne’ebé bisa-bisa
halo Amo Papa mos doko ulun maka habitasaun komunidade. Abitasaun ho klase favela
buras tebes iha área refere. Maske iha 2002 Tasitolu hetan sarani nudar fatin
sagradu no mos sai jardim ba dame, laiha esforsu neing ida atu bele realiza
visaun refere. Ida ne’e indiskutivel tanba realidade maka hatudu. Priméiru,
Tasitolu seidauk iha planu integradu ida atu bele envisiona ninia status hanesa
fatin sagradu no jardim ba dame. Iha inisiativu agoismu, individualismu, grupuismu,
no elitismu ne’ebé maka ita rona dala barak iha media. Hanesan projetu hotel Pelican
Paradise, projetu edifísiu parlamentu nasional, no mos projetu husi Ministériu
turismu nebe kala nain hira oan tur
koalia ba malu hasai kedan desenhu kona ba koseitu desenvolviment fatin sagradu
Tasitolu. Inisiativu hotu sira ne’e lá han malu ho visaun Tasitolu nebe sarani
ona. Nune mos, ita bele hare, inisiativu hira nee sei iha mehi deit no halo
publisidade deit. Maibe laiha ida maka implementa too agora.
Buat sira hanesan guvernu planu
laiha, visaun laiha, kontrolu laiha no asaun laiha maka fó espasu ba habitasaun
favela nakonu ona. Duke hein atu guvernu bele realiza ninia visaun Tasitolu
hanesan jardim ba dame no fatin sagradun, povu ninia visaun maka prevalese uluk
tia ona. Povu ninia planu no asaun maka manan uluk ona duke guvernu ninia planu
no visaun. Povu sira hanoin katak laiha planu ba Tasitolu, laiha regulamentu
nebe maka konsistente no responsavel entaun sira invade tia area refere tanba
nesesidade harí hela fatin. Povu lá bele dunik hein guvernu atu kria kondisaun
ba sira tanba lentu liu entaun sira foti inisiativa rasik tanba nesesidade
urgente. Uma hanesan nesesidade básika ba ema ida. Populasaun aumenta ba bebeik
iha sidade Dili maibe espasu lá nato’on atu akomoda. Hela area Tasitolu maka
mamuk, luan, no free, hein fali k? gass Brooo.
Nu fim komunidade kria rasik sira
nia habitasaun, forma rasik sira nia ordenamentu habitasaun baseia ba
nesesidade maibe laos baseia ba padraun ruma; sira rasik fornese sira nia
infraestrutura basika, no mos sira rasik halo gestaun baseia ba sira nia
kapasidade finanseira. Guvernu só ba halo sensus deit no mos ba organiza hodi
tuir eleisaun parlamentar, presidensial, no eleisaun chefi suku deit. Restu,
entrega tomak ba nain sira halo rasik.
Ho ida ne’e kondisaun lá dignu
tanba sira harí uma ho materia nebe ho kualidade temporariu, ho kustu baratu
entaun sira nia hela fatin lá seguru. Dala ruma anin mai bele sobu lalais, udan
mai be bele tama. Konsekuensia seluk fali maka infraestrutura básika lá
adekuadu tanba na’in sira kria tuir ninia kapasidade. Entaun soe foer be bot no
ki’ik lá tuir pandraun higeniu ninian; laiha fatin soe lixu doméstiku nune halo
susuk barak mos. Kondisaun hira nee bele afeta ba populuasaun sira ninia saude.
Kondisaun físiku ida seluk maka kona
bá lao dalan kareta ou motor (Estrada) iha rai luan Tasitolu ne’ebé lá iha planta
arrangamentu espasu ruma. Rai luan Tasitolu babain sai fatin atividade konsertu
no kampanha no tividade festivu seluk sira. Tanba laiha planta ba Estrada entaun
ninia konfigurasaun hare hanesan ramu ai parapa nian. Estrada tutan-malun tesik-malu
laiha orientasaun klaru. Kuandu ita lao maka kria rasik Estrada iha kampu luan refere.
Hanesan los iha alam bebas.
Atividade sira seluk nebe lá kompativel ho visaun sagradu no jardim dame ida seluk maka sai hanesan fatin ba aprende kareta ou kondus kareta; iha mos servisu terminal transporte públiku temporáriu mos, iha fatin paragem nebe uluk halo atu atende ba kareta sira nebe mai asiste eventu ou festa boot 20 de maiu iha Tasitolu. Maibe tanba to’o agora laiha terminal transpote públiku harí iha neba atu bele atende nesesidade servisu transporte públiku nian ba movimentu trafiku mai husi parte Loromonu nian, entaun uza ona sai terminal. Atividade sira ne’e kuaze akontese tuir situasaun no gostu deit. Nune povu mos toman at ona hakarak bá hela iha iha kualker fatin tuir gostu deit.
Jujusrly speaking, Tasitolu kuandu rona iha palestra ruma, iha diskusaun ruma, no iha publisidade ruma isin fulun hamrik kedas. Maibé bá visita tok, Amo Papa mos bele doko ulun. Hau espera katak komisaun organizadora bele fo independensia ba Amo Papa atu bele hili lao ba areadores palku misa nian hodi hasoru povu sira iha favela Tasitolu. Laos hasoru deit maka ema no fatin nebe kriadu tanba iha osan nebe alokadu. Hanesan aeroportu, hotel no palasius sira. Ho nune maka Amo Papa bele hasoru duni povu puru no igreija puru iha Timor-Leste. Nune mos atu bele hare tok Amo Papa doko ulun ou lae.
*Espera katak artigu nee bele fo inspirasaun ruma.
